500 onns Stadi liber da las Trais Lias – ediziun speziala da la «Terra Grischuna»

Sin passa 60 paginas sa deditgescha in’ediziun speziala da la «Terra Grischuna» al giubileum da «500 onns Stadi liber da las Trais Lias». Dacurt è cumparida l’ediziun da l’avrigl da la revista tradiziunala. Ella cuntegna contribuziuns cumplessivas davart il Grischun a partir da quel temp fin ozendi ed ultra da quai bleras infurmaziuns interessantas davart las festivitads.

La «Terra Grischuna» è la revista per natira, cultura e temp liber en il Grischun. Ella cumpara dapi passa 80 onns. L’ediziun 2/2024 da l’avrigl 2024 sa deditgescha en moda extendida al giubileum da «500 onns Stadi liber da las Trais Lias». Per questa ediziun han istoricras ed istorichers da renum rimnà lur savida davart l’istorgia dal Grischun e mess en scrit tala en contribuziuns captivantas. Il percurs istoric cuntegna ina dramatica e lascha reviver ils antenats per las Grischunas ed ils Grischuns. La retrospectiva cumenza tar la fundaziun e tar ils andaments dal Stadi liber e cuntinuescha fin a la fin da tal. La conquista e la perdita da regiuns, guerras ed il giavisch da pasch e da segirezza han influenzà durant blers onns il destin dal Stadi liber. La retrospectiva mussa plinavant en moda impressiunanta, co che la plurilinguitad è sa sviluppada en il chantun sco er ils auters effects dal passà che influenzeschan fin oz il mintgadi da las Grischunas e dals Grischuns. L’ediziun tschenta er la dumonda, tge effects ch’il Stadi liber ha sin la vita actuala en il Grischun.

Preschentaziun dals projects parzials e da las festivitads
L’ediziun speziala tematisescha er ils projects parzials. Tranter quels èn per exempel las Dietas da las Trais Lias, il «Atlas da l’istorgia dal Grischun 1524–2024» u l’exposiziun ambulanta «Stgazis grischuns sin viadi». Las manadras ed ils manaders dals projects preschentan ils contexts tar lur projects, explitgan las influenzas da l’istorgia e lur significaziuns istoricas. Da mintga project parzial resulta in’ovra, in’exposiziun e/u in’occurrenza. La finamira è quella da render pli enconuschenta l’istorgia dal Grischun a las Grischunas ed als Grischuns, e quai en moda nuncumplitgada, captivanta ed interessanta.

Resumaziuns en rumantsch ed en talian sco er maletgs impressiunants cumpletteschan las contribuziuns. Resultada è in’ediziun speziala da la «Terra Grischuna» che fascinescha in vast public. La Terra Grischuna pon ins retrair en l’abunament u en il shop online.

Ina bella schelta d’activitads da giubileum
Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum. Sin la pagina d’internet chattais Vus ultra da quai ina preschentaziun cronologica dals eveniments istorics.