500 onns
Stadi liber
da las Trais Lias
«Trais Lias per la vita», quai è il motto per il giubileum «500 onn Stadi liber da las Trais Lias». E viv daventi en tut il Grischun il 2024. ‘Bundstags’ vegnan organisads sco festas popularas, a chaschun da poetry-slams s’occupeschan giuvenils cun il Grischun e cun l’istorgia. Ultra da quai datti ina massa dad occurrenzas.
Dietas
Cuira, Tavau e Glion èn ils lieus nua che las ‘Dietas’ vegnivan salvadas tradiziunalmain. Il 2024 vegnan vitiers novs lieus. Gia ussa èsi cler: grondas discussiuns e festas datti en tut las regiuns dal Grischun.
Exposiziun ambulanta
«Stgazis grischuns fan viadi»
In’istorgia – bleras fassettas
Durant l’onn da giubileum viagia in museum mobil tras il Grischun e tematisescha da maniera multifara e nunspetgada l’istorgia e la cultura grischuna. En ses viadi tras las valladas rimna il mini-museum objects preferids da Grischunas e Grischuns e daventa uschia ina trucca da stgazis mobila.
Poetry Slam Contest
Istorgia è sitga e lungurusa? Tuttavia betg! Il 2024 mussan giuvenils a chaschun da Poetry Slam Contests co ch’ins sa metter en scena l’istorgia cun pleds variads e da maniera captivanta. Ordavant datti workshops cun in profi da la furma artistica litterara performativa da «Slam-Poetry».
Atlas da l’istorgia da Grischun
Co è il Grischun sa sviluppà ils davos 500 onns? Quai muss il nov «Atlas da l’istorgia grischuna» – e quai da maniera viva: 50 temas relevants per la vita vegnan visualisads cun cartas, maletgs e graficas.
Teater al liber «Libertad è in bain prezius»
Il cumenzament dal temp modern muventa er las Trais Lias. Il mercenariat ambivalent, la pussanza sur la Vuclina, il svilup da la refurmaziun e la cuntraversa cun las grondas pussanzas estras promovan la fusiun da las Trais Lias e pussibiliteschan ad ellas da defender lur agens interess. L’epoca turbulenta vegn exprimida en in nov, grond teater al liber che Origen realisescha sin la planira auta da Lantsch.
Med d’instrucziun
Tge resta cur ch’il giubileum «500 onns Stadi liber da las Trais Lias» va a fin? Ultra dal nov «Atlas da l’istorgia grischun»” nascha a chaschun dal giubileum era in nov arranschament d’emprender per il nov med d’instrucziun «InVista grischuna», infurmativ, digital ed en otg linguas.
Gieu auditiv «Ils draguns da las Trais Lias»
Il dragun dal Piz Gren duai avair gì differentas aventuras avant sia bandischun.
Il gieu auditiv raquinta en diesch episodas la saga dal dragun grischun. Audituras ed auditurs fan in viadi istoric cun relaziuns cun il preschent dal Grischun actual.
Occurrenzas
Art u culinarica? Concert u excursiun? Il giubileum «500 onns Stadi liber da las Trais Lias» vegn accumpagnà da numerusas occurrenzas. Davart quellas occurrenzas vegn infurmà qua cuntinuadamain. E tgi che ha sez in’idea u in project, dastga gugent s’annunziar tar il team dal project.
