500 onns Stadi liber da las Trais Lias – rinforzà la conscienza per l’istorgia

Sut la devisa «Trais Lias per la vita» è vegnida commemorada l’onn 2024 la fundaziun da l’emprim stadi independent e festivada cun in grond dumber d’occurrenzas e da projects. La Regenza ha prendì enconuschientscha dal rapport final davart las festivitads. Las finamiras ch’eran vegnidas fixadas en il concept per las festivitads da giubileum èn vegnidas cuntanschidas ed il rom finanzial da 2 milliuns francs è vegnì resguardà.

Suenter che la Regenza aveva tratg ina bilantscha legraivla gia il december 2024, prenda ella enconuschientscha er dal rapport final cun gronda appreziaziun. Il rapport documentescha en moda impressiunanta la diversitad e la vitalitad da las activitads e dals projects ch’èn vegnids realisads en tut las regiuns linguisticas dal chantun.

Finamiras principalas cuntanschidas, preventiv resguardà
Las finamiras centralas ch’eran vegnidas definidas en il concept per las festivitads da giubileum – rinforzar la conscienza istorica en il Grischun e promover la convivenza – èn vegnidas cuntanschidas. Grazia ad ina planisaziun consequenta dal project, ad in diever sistematic dals meds finanzials sco er ad in’organisaziun effizienta, ha il rom finanzial previs da 2 milliuns francs pudì vegnir resguardà.

Vast sustegn e resonanza positiva
Las activitads da giubileum èn fruntadas sin gronda resonanza: Numerus resuns positivs da persunas participadas, d’organisaziuns partenarias sco er da visitadras e visitaders entusiasmads dattan perditga dal vast sustegn da la populaziun. Ina lavur engaschada da medias e da publicitad ha plinavant procurà, ch’il giubileum è stà visibel e perceptibel lunsch suror las regiuns. «Cun passa 400 occurrenzas en tut las regiuns linguisticas ha il Grischun mess in segn impressiunant d’unitad. La fusiun da las Trais Lias avant 500 onns è stada in eveniment epocal – e ses effect è preschent anc oz en noss mintgadi cuminaivel. L’onn da giubileum ha mussà en moda impressiunanta, quant viva che nossa istorgia è e quant ferm ch’ella ans collia», cumplettescha il cusseglier guvernativ Jon Domenic Parolini, il parsura da las festivitads.

In grond engraziament a tut las persunas participadas
A tut las persunas participadas exprima la Regenza in grond engraziament per lur engaschament, per lur creativitad e per lur contribuziun da dar vita en moda impressiunanta a la memoria dal Stadi liber ed a sia impurtanza ch’è anc oz preschenta.