Chor viril ligia grischa sin viadi historic
Dapi prest 175 onns ei il Chor viril Ligia Grischa in ambassadur fetg remarcau e stimau dalla cultura da cant romontscha el Grischun e lunsch sur ils cunfins cantunals ora. Ils fundaturs dil chor han tscharniu in num da gronda muntada historica. Per il giubileum «Sut igl Ischi 2024» ei il chor secapescha dalla partida.
Ensemen cun il historicher Adolf Collenberg, in quartet instrumental ed in percussiunist semettan ils 80 cantadurs sin ina turnea da concerts: a Trun, Glion, Domat e Mesocco – quater loghens da gronda muntada historica – presentan els in program da concert cun canzuns e cuortas contribuziuns historicas davart la Ligia Grischa. Senza il giavisch da libertad e pasch havess ei buca dau igl engirament «a Trun sut igl ischi». La ligia ei stada mo igl emprem pass en direcziun dall’independenza. Igl ei spert semussau – e quei ei tochen oz buca semidau – ch’ins sa mantener la libertad mo cun agid d’ina allianza pli gronda.
Els loghens ed ellas regiuns impurtontas per la fundaziun dalla Ligia Grischa san ils quater concerts scaffir spazis per sentupadas cun la populaziun locala. Il medem mument duein ils concerts possibilitar da s’occupar cun il spért da lezzas uras, il giavisch dad esser independents.
Responsabel:
Giusep Giuanin Decurtins
Interprets:
Christoph Cajöri (cumponist e dirigent)
Adolf Collenberg (historicher)
Chor viril Ligia Grischa
societads da musica e chors locals
Termins
27.04.2024 allas 20:00 uras a Trun (Baselgia Sogn Martin)
28.04.2024 allas 15:00 uras a Mesocco (Castello)
04.05.2024 allas 20:00 uras a Glion (Baselgia claustrala)
05.05.2024 allas 19:00 uras a Domat/Ems (Pfarrkirche)
Ulteriuras infurmaziuns: www.ischi2024.ch
