Sut igl ischi – il teater
La Ligia Grischa ha oz 600 onns. Allianzas da tuttas fuormas ein oz pli actualas che zacu. Senza allianzas da tiaras, senza la
collaboraziun da vischnauncas fuss bia buca pusseivel. Il teater sut tschiel aviert «Sut igl ischi – il teater» vul tematisar quels aspects: Tgei piarda ina vischnaunca, sch’ella dat si sia identitad e siu spért ni sch’ella vegn dirigida d’ordvart? Tgi sa oz aunc mobilisar forzas per defender l’autonomia, il plascher e la luschezia, per l’appartenenza ad ina cuminonza che decida libramein?
Trun ha ina liunga tradiziun da teater. El vargau han ins savens dau classichers litterars. Cun il toc teater sut tschiel aviert «Sut igl ischi – il teater» risguardan ins quella tradiziun, mo il medem mument fan ins era in pass egl avegnir. Il toc ei vegnius screts explicitamein per Trun ed igl onn da giubileum e considerescha las atgnadads dalla vischnaunca e dalla regiun. Igl autur muossa ina variaziun da present e futur. Eis ei uras per ina nova ligia?
Il toc da teater gioga el temps dad oz, selai denton era inspirar da fatgs historics dalla veglia Ligia Grischa. El ei il medem mument , frestgs, humoristics e divertents. Ina historia cun in artg che unescha text e musica. Il toc amiez Trun duei incantar schibein il public giuven sco era pli vegl.
Igl autur dil toc ei Michel Decurtins ch’ei sez carschius si a Trun. El capescha da metter en scena temas actuals. La musica che Mario Pacchioli ha cumponiu aposta per il toc lai daventar la presentaziun in’unitad homogena. Per la reschia ei René Schnoz responsabels. El ha gronda experientscha cun inscenaziuns da representaziuns da teater sut tschiel aviert e cun la lavur cun laics.
Esther Berther (meinaproducziun)
Michel Decurtins (autur)
Mario Pacchioli (musica)
René Schnoz (reschia)
Uniun da teater Trun
Termins
16.08.2024 allas 20:00 uras
17.08.2024 allas 20:00 uras
18.08.2024 allas 20:00 uras
23.08.2024 allas 20:00 uras
24.08.2024 allas 20:00 uras
25.08.2024 allas 20:00 uras
29.08.2024 allas 20:00 uras
30.08.2024 allas 20:00 uras
31.08.2024 allas 20:00 uras
Liug
Trun, Paliu da Sogn Martin, unter der Dorfkirche
Ulteriuras infurmaziuns: www.ischi2024.ch
