«L’ultim dragun»
las otg episodas
Ils otg chapitels vegnan raquintads da l’actura grischuna Ursina Lardi – per rumantsch, tudestg e talian. Tut las otg episodas èn disponiblas qua gratuitamain e pon vegnir utilisadas libramain. Bun divertiment cun tadlar!
La bandischun
Avant passa 13000 onns èn cumparids ils emprims umans en il Grischun. Dapi lura vegnan els observads – da draguns. Ina da questas creatiras raquinta co ch’igl è stà per els sco draguns e per ils umans durant quest lung temp. E temp per raquintar ha el avunda, il dragun dal Schwarzhorn, tant temì antruras. Avant passa 200 onns è el vegnì bandegià en in cuvel e qua spetga el anc adina das esser deliberà.
Il davos sgol
Il 1796 vul il dragun dal Schwarzhorn far ina visita a ses cusrin, il dragun da Macun en Engiadina. El guarda la Lia da las Diesch Dretgiras or da la perspectiva d’in dragun, arriva en la Lia da la Chadé e constatescha cun displaschair ch’i na dat pli nagins «Macuns», nagins capricorns. Il dragun na smina betg che quai è stà ses davos sgol avant la bandischun.
Il dragun dal Schwarzhorn
En la Val Sertig, la val laterala pittoresca da Tavau, vegn la ditga dal dragun dal Schwarzhorn raquintada anc oz. Quest monster cun alas haja engulà muaglia e perquai saja el vegnì bandegià en in cuvel. Il dragun sez ha udì pliras giadas questa ditga. Ussa sa regorda el ch’il frar das ses tat, in dragun dal territori da la Lia Grischa l’aveva avertì dals umans.
La smaladicziun da la guerra
Il dragun dal Schwarzhorn aveva gì difficultads cun ils umans gia ditg avant la bandischun: il 1499 aveva el vulì visitar ina mar da fluras misteriusa en il Partenz, ma è vegnì entretschà en ils scumbigls da la Guerra svabaisa. En la Val Müstair ha el lura entupà in legendar erox grischun da la libertad: Benedetg Fontana.
Autras vuschs
Il dragun auda las vuschs da quels umans che han fundà las Trais Lias avant tschientaners: la Lia da la Chadé (1367), la Lia sura u la Lia Grischa (1395) e la Lia da las Diesch Dretgiras (1436). Il dragun ha dentant udì anc dapli: Co che la Brev da Federaziun da questas Trais Lias è vegnida scritta cun tinta sin pergiamina il 1524. Quai è stà la vaira entschatta dal Stadi liber da las Trais Lias.
Autras creatiras
En il Stadi liber da las Trais Lias datti dapli creatiras che mo umans ed animals. Il dragun dal Schwarzhorn raquinta da questas creatiras: dals umins selvadis en il Partenz, da las dialas en la Val Müstair, dal pievel da la notg en il Scanvetg, da l’armada vilada en Surselva, dals spierts en Engiadina e dals gigants en il Puschlav.
Retschertgas
En il Stadi liber da las Trais Lias datti creatiras curiusas sco umins selvadis e dialas. Ma las creatiras las pli curiusas per il dragun èn ils umans. E per el è il Stadi liber da las Trais Lias almain uschè cuntradictoric sco ils umans. Sias retschertgas per eruir l’essenza dals umans e l’essenza dal stadi fan naufragi.
Il davos temp
Davent da ses cuvel vesa Il dragun dal Schwarzhorn il declin dal Stadi liber. El auda co chi’il stadi entschaiva a balluccar, co che schuldada entra en il pajais. Anc ina giada fa el in maletg dal Stadi liber – avant chel explitgescha co ch’ins sa rumper il scungirament che tegna en praschun il dragun dal Schwarzhorn en quest cuvel.
