Exposiziun ambulanta
Proxima fermada: Istorgia! Cun «Stgazis grischuns fan viadi» viagia in container modern tras il Grischun. El preschenta chaussas captivantas ed infurmativas davart l’istorgia e la cultura dal chantun e da sias abitantas e da ses abitants. En il center stattan bains culturals famus sco era stgazis persunals che vegnan rimnads al lieu sco emprests. In program accumpagnant varià cumplettescha il viadi d’exploraziun.
Plan da la turnea
L’exposiziun ambulanta «Stgazis grischuns fan viadi» fa etappa en 12 lieus en tut il Grischun.
Tiny-Museum modern
Il museum mobil mussa la gronda varietad en in pitschen spazi e collia da maniera fascinanta il passà ed il preschent, intermediaziun da savida ed interacziun, divertiment e barat . In facsimile da la Brev da Federaziun dals 23 da settember 1524 ed ulteriurs muments decisivs da l’istorgia grischuna pon vegnir scuverts.
Emprests da la populaziun grischuna
L’element essenzial da l’exposiziun ambulanta è ina gronda curuna da miniaturas cun ils emprests da la populaziun grischuna che accumpognan il viadi. Els mussan bain tge che Grischunas e grischuns collian cun il chantun, cun la patria e cun l’esser dachasa. Sco bains culturals individuals persunals fan els la punt interessanta als bains culturals da relevanza per l’entira societad.
Instituziuns culturalas GR @Porta Cultura
Instituziuns culturalas da l’entir chantun han elegì objects che reflecteschan las caracteristicas dal Grischun, tge che patria è u sa esser. In code QR maina al nov portal da cultura digital dal chantun Grischun e porscha ulteriuras infurmaziuns davart ils objects sin las illustraziuns. La «Porta Cultura» avra il sguard vers la cuntrada da la cultura grischuna.
Program accumpagnant
«Bündner-Land», program da tribuna cun il cromer ambulant
La tura dal museum vegn accumpagnada dal cromer ambulant divertent. L’actur Erwin Dirnberger, enconuschent per ses tocs d’ina persuna na preschenta betg mo 500 onns istorgia, mabain era autopurtrets e maletgs dad auters da las Grischunas e dals Grischuns e divertescha ils giasts dal museum en las valladas.
Spassegiadas culturalas «Kultour»
L’uniun «Wanderwege Graubünden – Sendas grischunas» realisescha tar mintga fermada da la tura spassegiadas instructivas dal museum mobil ad ina instituziun culturala en vischinanza (Kultour). Manadras e manaders professiunals famigliariseschan amaturs da viandar cun la cultura e las bellezzas da la natira grischuna.
Prelecziuns, referats e preschentaziuns da cudeschs
Differentas preschentaziuns enritgeschan il temp che l’exposiziun è en in lieu. La Fundaziun svizra da las funtaunas da dretg e l’Archiv dal stadi dal chantun Grischun preschentan t.a. perlas dals protocols da las dietas federalas dal 1567 al 1797, adattadas a la regiun correspundenta.
