Projects
Co san ins reglar internamain conflicts? E co sa preschentan ins vers anora. Talas dumondas vegnan tractadas en la brev da federaziun dal 1524, l’emprima constituziun “grischuna”. Ussa vegn la brev da federaziun edida da nov – e las dumondas vegnan respundidas da maniera bain chapibla en in nov med d’instrucziun.
Cudesch «La Brev da Federaziun dals 23 da settember 1524»
Il 1524 èn sa reunidas la Lia Grischa, la Lia da la Chadé e la Lia da las Diesch Dretgiras. La reuniun da las Trais Lias è vegnida fixada en ina Brev da Federaziun. Quest document vegn ussa edì da l’Archiv dal stadi dal chantun Grischun. L’ediziun dal text original vegn accumpagnada dad ina reproducziun dal text en lingua moderna e d’ina preschentaziun istorica.
Il cudesch ha ina agiunta cun ina reproducziun fotografica da la Brev da Federaziun en grondezza originala.
Teater al liber «1524»
Sin la planira auta da Lantsch ha in grond teater al liber sia premiera. El raquinta da las discordias politicas en las vals grischunas, dal gieu europeic da las pussanzas e da la naschientscha dal stadi liber. En vischinanza directa dal lieu d’impurtanza istorica Vazarouls vegn construida ina tribuna al liber entamez la cuntrada. Acturas ed acturs sa movan sin la prada vasta, vegnan ensemen e svaneschan puspè a l’orizont. Il sguard dad aspectaturas ed aspectaturs s’avra en la cuntrada grondiusa. Il gieu liber fa in grond artg che illuminescha ils decennis avant e suenter la conclusiun da l’allianza.
La Nova Fundaziun Origen realisescha ils teaters al liber cun il sustegn generus da las vischnancas dad Alvra, Bravuogn Filisur, Lantsch, Surses, Schmitten e Vaz sco er dal chantun Grischun. www.origen.ch
Cudesch «Atlas da l’istorgia dal Grischun 1524 – 2024»
L’ «Atlas da l’istorgia dal Grischun 1524-2024» visualisescha 50 temas en ils secturs populaziun, ambient, economia, politica e cultura. El vegn edì en moda digitala ed en furma da cudesch, da retrair en tut las linguas chantunalas, da l’Institut grischun per la perscrutaziun da la cultura en stretga collavuraziun cun l’Archiv dal stadi dal chantun Grischun.
L’atlas cumpara il settember 2024.
Med d’instrucziun
Il giubileum «500 onns Stadi liber da las Trais Lias» rinforza la schientscha istorica en il Grischun – e quai surora l’onn da giubileum per propi. Generaziuns futuras profitan d’in arranschament d’emprender en il nov med d’instrucziun digital e pluriling: «EinBlick Graubünden».
Gieu auditiv «L’ultim dragun»
Il dragun dal Schwarzhorn duai avair gì differentas aventuras avant sia bandischun.
Il gieu auditiv raquinta en otg episodas la saga dal dragun grischun. Audituras ed auditurs fan in viadi istoric cun relaziuns cun il preschent dal Grischun actual.
